No mikäh ny mättää, ko kukhaan ei etes huomaa, että mulla oli jo kolme päivää sitte synttärit? Mie täytin 2 v 11 kk, mutta kukhaan ei etes onnittele!
Joku meinas, että alkasinko mie jo isäksi, mutta mamma sano, etteihän ne vauvat vielä semmosista hommista ymmärä. Niin mistä hommista? Ja miten niin isäksi? Miehän olen mamman poika, enhän mie ny sille isäksi voi alkaa!
Mutta mie kuulin, että mulle oli tullu pikkusisaruksia ja näin mie niistä kuvanki. Toinen oli vähä minun näkönen. Ja äitiki oli kuvassa niin kauhniina, että semmonen lämmin henkäys meni minun läpi.
Mie olen saanu käyä kaks kertaa mettässä laukkomassa ja lintuja haukkumassa. Lunta on ollu kyllä aika paljo, mutta ei se minua haittaa. Lumessa laukkominen on mukavaa, mutta kyllä siinä aika helposti mennee voimat.
Toisela kerrala mie näin Rekun, ja sen kans meni aivan mukavasti, mutta naapurin Pomosta on tullu oikea kiusanhenki. Se alisti minua mökilä ja kävi pääle, vaikka ennen se on ollu muka niin mukava. Saakeli, että otti päähän, ko minut panthiin eri huohneesseen ja Pomo valtasi koko mökin, aivan niin ko se olis muka sen!
Leikkimisestä mie kyllä tykkään! Mie ruukaan viä pihale kampheita ja hakea mammaa ja pappaa leikkihmään. Aina ne ei tajua tai jaksa, mutta sitte mie haen vielä muutaman kampheen ja tulen uuestaan hakehmaan niitä ulos. Apinan ja ketun heittely ja puijuutus on mukavaa, ja myös violettia makkarakoiraa on hauska hakea. Mie olen oppinu aukasehmaan saunan lasioven kuonola. Mie pökkään sitä niin luijjaa, että se aukeaa ja menen niin ko läpi siittä. Mamma varottellee, että kuono mennee vielä rikki, tai ovi, mutta eipä ole menny!
Tässä yhtenä päivänä met käythiin joela kävelemässä ja tulipaikala tulistelemassa. Mie olisin halunu juosta vappaana ko tuulenhenki ja tuntea viiman turkissa, mutta minua ei päästetty mihinkhään. Köytethiin kiini roskakorhiin tai pelastusrenkhaasseen. Otti päähän.
Nyt mie laulan itteleni onnittelulaulun ja panen sitte nukkuhmaan. Ens kuussa piethään pilheet, ko minusta tullee sillon vissiin täysi-ikänen.
