Meilä on semmonen perine, että minun syntymäpäiviä vietethään joka kuukausi. Vähän niin ko koko ajan on pikku juhlia. Nyt mie täytin 3 v 3 kk (9.6.2021), ja mamma ja pappa järjesti oikein syntymäpäiväkiertuheen. Menthiin paikkakunnalta toisele ja mie sain rapsutuksia ja kehuja joka paikassa. Olipa mahtavaa! Autossa on mukava katela maisemia ja torkkua joko istuen tai maaten, mutta en mie kovin kauon tykkää maata. Maisemien kattominen on paljo mukavampaa. Mamma välilä huutelee etupenkiltä, että mitenkäs sulla mennee ja mie vastaan, että aivan hyvin.
Met lähimä maanantaina 7.6.2021 liikentheesseen ja ajoima Kalajoele. Sielä ei tapahtunu vielä mithään, mutta kävin mie vähän sielä mettässä haistelemassa ja kyykkimässä. Siittä net kehut kuitenki alko.
Meän oli tarkotus mennä seuraavaksi Vaashaan, mutta se jou'uthiinki peruhmaan, ko lähtö viivästy pari päivää. No sitte tuli pitkä ja mutkanen etappi Ähtähriin. Sielä menthiin hotehliin, joka oli räihäytetty kallion sisäle. Se oli kyllä kaukaa hieno ja niin ko upposi maisehmaan, ja seiniläki oli vielä kalliota näkyvissä, mutta ko lähethiin huohneeseen, mie kyllä ajattelin, että hauthaanko sitä menhään. Hoteli oli rakennettu vuona 1976, ja sen kyllä haisto: ummehtunut ilma, vanhat kokolattiamatot ja vanhoja pintoja. Mutta huohneessa saatto nukkua ja siittä pääsi heti kätevästi ulos. Hienoja maisemia löyty lenkkipolulta. Mamma ja pappa puhu jotaki takiinista, lehmistä ja pandoista, mutta mie en niitä nähny, ko minua ei saanu ottaa matkhaan. No, mie ymmärsin sen ja oottelin rauhassa kämpilä.
No sitte met ajoima Porhiin ja Yytehriin. Sielä oli mahtavat näkymät, mutta hiekoile mie en saanu taaskaan mennä. Oottelin papan kans, ko mamma kävi ihhailemassa paikkoja.
Porista oliki lyhyt matka Turkhuun, johon met parkkeerasimma pariksi päiväksi. Sieläki oli mukava hotelli, ja sain herkku- ja kakkapussipaketin taas. Turku oli kyllä vissiin hieno paikka, mutta sielä oli vähän turhan kuuma ja turhan paljon hajuja, niin että mie menin vähän sekasi ja kuola alko valuhmaan suupielistä. Sielä mie en käyny paljo missään, mutta viileässä huohneessa oliki paljo mukavampaa levähellä.
Sielä hotellissa oli hissiki. Siinä kulkeminen on aivan lelliä. Sen homman mie kyllä ossaan, niin ko vettä vain. Jokku ihmettellee, että miten pohjanpystykorva pystyy olehmaan reisussa, mutta mie sanon, että ei se ole poika homma eikä mikhään. Senku opettellee vain, ja ko kulkee niin oppii ymmärtähmään, että elämää on muualaki ko vain oman häkin sisälä ja kotipihala. Sitä niin ko sivistyy.
Turusta met poikkesimma Kustahviin. Se oli hieno ja mukava paikka. Vaikka ensin näytti, että sielä ei ole mithään, mutta ko mamma hävisi johonki, niin kohta se tuli vaatepussien kans takasi ja esitteli kleemujansa, joita oli löytäny jostaki putiikista. Niin että oli sielä jotaki. Met oottelimma papan kans vähän varjosammilla paikoila.
Kustavista ajethiin Espoosseen, ja se oliki kaikkein paras paikka! Mie sain taas herkkupussin. Respan naiset ja siivoja ihastuivat minhuun heti. Mie menin niitten kainahloon, ko ne kyykisty rapsuttahmaan minua. Istuin rauhassa ja annoin niitten kehua ja rapsuttaa. Sitte met saima semmosen huohneen, jossa oli parveke. Voi jepulis! Se oli mulle aivan ihanepaikka: sopivasti varjosa, ja siittä saatto seurata suppailijoita ja lokkeja. Tuossa parvekheela sain olla rauhassa ja ajatella omia ajatuksia. En haukkunu yhthään. Vietin vain ihania mindfulness-päiviä. Olipa mahtavaa! Huohneesta pääsi käytävän puolelta heti ulos ja lenkkeilehmään tosi hienoissa maisemissa. Olthiin siinä hotellissa kolme yötä.
Ja sitte sinne tuli Iipo! Voi ilon päivää. Olipa mahtava nähä sitä! Met kävimä vielä sen kotonaki ja yhessä toisessa kyläpaikassa, ennen ko lähethiin kotia kohti. Mamma ja pappa on mukavaa reissuseuraa, eikä mulla ole mithään hättää. Parin tunnin vällein pysähelhään, jalotelhaan ja juohaan vettä, ja autossa on hyvä ilmastointi. Oli oikein mukava reissu ja opin paljo elämästä. Ehkä vähän rauhotuinki, ja ehkä vähän aikuistuin, niin net ainaki meinasi.
Reissussa on mukavaa, mutta kyllä koti on ihana paikka! Uni maistu sunnuntai-illasta tiistai-iltapäihvään asti. Juuri ja juuri tarpheila kävin, mutta erityisesti en halunu lenkkeilä.
Seuraavaksi mie ootan, että pääsee taas venheesseen. Seki on mukavaa.
