Sunnuntaina 10.3.2024: "Sie olet elämän valo" ja muita mukavia asioita

Perjantaina alko joku kuhina. Mamma ja pappa alko pakkaahmaan ja mie huomasin, että jonnekki ne on lähössä. Minua alko jännittähmään, että pääsenkö mie matkhaan. Minua hengästytti ja kuljin mamman perässä niin ko hai laivan perässä. Mamma sano, että met menemä Vaashaan minun synttäreitä viettähmään. Jaahas, vai niin! Se sano vielä, että sielä pittää sitte puhua ruottia.

Ko mie pääsin authoon, hyppäsin omhaan häkhiin ja aloin kattelehmaan maisemia. Se mulla suijjuu tosi mukavasti. Hotellissa mie ossaan kulkea hississä, niin ko vanha tekijä. Olen mie sen verran monta kertaa jo ollu reissussa, että sekhään ei ole poka homma eikä mikhään.

No sitte tuli lauantai ja minun synttäripäivä. Mamma harjasi minut hienoksi ja laitto taas rusetin kauhlaan. Mie poseerasin. Senki mie ossaan. Mamma ihhaili minua, laulo synttärilaulun ja sano, että "Sie olet elämän valo." Voi mahoton, ko se lämmitti! Mie olin niin hyvihlään. Käythiin sitte mamman kans kaupungillaki ja mulla oli rusetti kaulassa. Ihmisiä hymmyilytti.

Mie sain hotellista lahjaksi kakkapusseja, puruluun ja maissintähkälelun. Mammalta ja papalta mie sain uusia purutikkuja ja allerkisten koirien ruokaa, ko mulla ruukaa vuotaa silmät. Tontun mie sain jouluna.

Met kävimä monta kertaa lenkilä ja välilä mie olin huohneessa yksin, ko mamma ja pappa menit syöhmään. Lenkilä mie näin yhen mäyriksen, jolta mie kysyin ruottiksi, että "Kukas sie ålet?" Se sano, että se on Mårten.

Ko ilta tuli, mamma laitto synttärikuvan fasepuukhiin ja mie sain 182 tykkäystä ja monta kymmentä onnittelua. Moni kehu minua komeaksi.Seki oli mukavaa. Nyt mie olen 6 vuotta. Se on hyvä ikä.

Sunnuntaina 11.2.2024: Synttärit oli ja meni

Nukkuminen on kyllä mukavaa, mutta meilä kuuluu koko ajan: "Mene vain nukkuhmaan", "Nukuma vähän aikaa" ja "Ei nyt mennä ulos", "Ei nyt jakseta alkaa leikkihmään.", "Leiki yksin." ...  

Mie yritän kuljettaa tonttua, palloa ja muita kampheita ja selvästi sanoa, että "Leikithään!" "Lähemä ulos!" "Tule sieki ulos minun kans", mutta ei siittä taho tulla mithään. Mamma kyselee, että onko se vanhan näkönen? Jos multa kysyttäis, mie sanosin, että ei se ole vain vanhan näkönen. Se ON vanha! Saakeli, että minua joskus ottaa päähän olla koko ajan niitä perässä vetämässä johonki touhhuun. Kyllä mie lenkile pääsen joka päivä, mutta eipä paljo mithään muuta. Ei ole mettässä vaphaana laukkomista, ei ole mithään harrastusta. Kavereitaki käy vain harvoin. Ei ole muuta ko "Nuku, nuku!"

Kaverit kyselee, että mitä tehit synttärinä. Mie siihen, että en mithään. En toelakhaan mithään! Nukuin niin ko muinaki päivinä! Niinhän se meni seki päivä ohi ja vasta parin päivän päästä se etes otethiin esile. No eihän se mikhään pyöreitten vuosien päivä ollukhaan. Mutta ens kuussa on tasan pyöreä kuus. Jospa sitte ees jotaki ....

Mulla on semmonen kirjantarkistustehtävä työhommana. Ko mamma alottaa uuen kirjan, mie nuuhkin sen ensin läpi ja hyväksyn. Se on vähä minun vastuula, että mamma ei lue mitä sattuu. Mie olen meän talon kirjapäällikkö tai hyvinvointipäällikkö, niin ko nykyhään sanothaan.

Tiistaina 9.1.2024. Pohjanpirttikoiran pulinapoksi

Nyt on ollu niin saakelin kylmä, että mie en ole ollu häkissäkhään joulun jälkheen. Olen käyny vain asioilla ja pikku lenkeilä. Nyt ko vähä lauhtu, niin alko taas katolta kuuluhmaan jyrinää ja lumiläjät tippuhmaan. Mie meinasin,  että en lähe ulos, mutta minut vähä niin ko pakotethiin.

Jouluna meilä oli porukkaa. Oli Iipo, Laapo ja Raapo. Mieki sain joululahjan, niin ko muukki. Se on tonttu ja se on oikein mieluisa kaveri. Mamma ja pappa sait pohjanpystykorvapipon ja -pannan. Seki on tosi hieno lahja, jonka meän ystävä Siipo anto.

Joulunaki oli kyllä pakkasta, mutta met olima tulila ja uutenavuotena samoten. Minusta on mukavaa, ko olhaan yhessä ulkona.

On mulla vielä yks muuki mukava asia. Mie sain uuen kaverin, Ollin. Se kävi meilä kylässä ja met lenkkeilimmä ja tanssima joulupolkkaa. Oli oikein mukava ilta. Tiipo käytti Ollia meilä.

Joulun kunniaksi piti taas panna rusetti kauhlaan. Mamma meinasi, että mie olen niinko presitenttiehokas. Kyllä mie vain senki ossaisin; ei sole poka homma eikä mikhään!

Nyt mie jatkan synttäripäivän viettoa. Täytän tänä päivänä 5 v ja 10 kk. Molen kohta jo kuus!

Lauantaina 9.12.2023: Mamma taitaa olla vähä läheisriippuvainen

Mie olen kuulu läheisriippuvaisuuesta: että joku takertuu toisseen, eikä ossaa päästää irti, vaikka toinen olis kuinka vanha.  Mie olen alkanu ajattelehmaan, että mamma on semmonen. Mie jaksan aina ihmetellä, ko mamma käypii jossaki, vaikka kirjastossa tai kaupassa ja mie olen yksin kotona, niin sitte, ko se tullee takasi, se lätisee aivan mahottomasti, kuinka hieno koira mie olen ja kuinka hienosti mie pärjäsin yksin kotona ja etten ennää ole mikhään pikkupentu. No en toelakhaan ole! Tänä päivänä mie täytän 5 v ja 9 kk, eli mie olen ihmisten iässä vissiin jo melkein 36-vuotias. No kai sen ikänen jo pärjää puoli tuntia yksin! No ei siinä mithään, kyllä mulle rapsutukset aina kelpaa, mutta tuota lätinän määrää mie ihmettelen. Mutta, ko mamma on mulle rakas, niin kyllä mie sen kestän.

Mie olen ollu tet-harjottelussa jo puoli vuotta. Se on ollu semmonen lähihoitajahommeli. Mie olen ollu siinä hyvä ja hoitanu kympilä kaikkia niitä, jokka on hoitoa tarvinu. Mie luulen, että mie saan tästä hyvän toikkarin. Kyllä mie voisin kakkosammatiksi tämmöstä hoitajahommaa aatela. Voisin olla vanhustentaloissa rapsutuskoirana tai sitte kouluissa tai kirjastoissa lukukoirana. Sitä pitäs vissiin kuitekki etukätheen harjotella. On niitä kuulema semmosia koulutuksiaki olemassa. Pittää alkaa ottahmaan selvää, sitte ko tämä tetti loppuu.

Mamma ja pappa kävit parisuhematkala Tokmannilla. Mamma puhisi tyytyväisenä. On kuulema mukavaa, ko on tavallista elämää.💕

Tuossa kuvassa mulla on kuuraparta ja mamma halusi kuvata sitä, mutta mie en halunu kääntyä.

Sunnuntaina 12.11.2023: Hyvvää isänpäivää, pappa!

Pappa on minun ihmisisä, vaikka mie sanonki sitä papaksi ja mammaa mammaksi. Hyvvää isänpäivää sulle, pappaisä! 

Mie olen elely vähä hiljaiseloa ja nukkunu aika paljon papan kans. Kyllä mie mammanki kans nukun. Yritän olla tasapuolinen.

Viime aikoina on kaks kertaa ollu kivoja päiviä, ko Iipo kävi kahesti peräkkäin. Oli mukava lenkkeilä vähä pitemmästi ja katela ja kuulostella maisemia. Sitte oli mukava leikkiä ja saaha tosi paljo rapsutuksia. Se nappasi minusta muutamia hienoja kuvia. Tuo auringonlaskukuva on minusta mahtava! Siittä tykäthiin tosi monta kertaa pohjisface-ryhmässäki. Laitan net tähän muistoksi.

Ei mulla nyt muuta, mutta kaikile fanikerholaisile tioksi, että mie voin hyvin ja piän huolta papasta ja mammasta parhaan taitoni mukhaan.

Maanantaina 9.10.2023: Ei täälä ole kethään ja mie en puhu mithään!

Täälä ei nyt kerta kaikkihaan tapahu mithään! Täälä vain nukuthaan ja käyhään lenkilä. Mihinkhään ei lähetä, eikä mithään jännitystä ole. Kukhaan ei oikein jaksa leikkiäkhään. Em miekhään. On vain yhtä ja sammaa. Jotaki kummaa täälä nyt on menossa, mutta kyllä mie meinaan jaksaa oottaa, että vielä tässä ennen joulua päästäs methään.

Tuo minun kuva on syyskuulta. Met olima sillon pihala mamman ja papan kans tulistelemassa. Se oli  mukava ilta.

´

Niin, ja kävihän se Laapoki minua tervehtimässä. Että onhan sitä kuitekki mukaviaki asioita ko pysähtyy miettihmään.

Perjantaina 8.9.2023: Mie olen vähä ihmetelly tätä syksyä ja ollu yötuurissa vahtihommissa

Kyllä mie sen tiän, että nyt on syksy. Ulkona haisee syksy ja aamula on semmosia kirpakkailmoja. Mie olen vähä ihmetelly, ko nyt ei tule methään lähtöä ollekhaan. Olen mie ollu monta kertaa valhmiina, ko pappa on aamusta johonki lähteny, mutta ei se ole ottanu minua matkhaan. Naapurin Kaapoki oli johonki menossa, mutta meilä ei nyt kukhaan lähe mihinkhään. Kumma homma!

Mie olen tehny yötuurissa vahtihommia. On ollu jotenki levottomia öitä: valoja on sytytelty, telkkaria on katottu ja touhuttu monenlaista outoa. Mie olen tietekki vahtinu silmä kovana, että mitä täälä oikein tapahtuu. Aamula on sitte nukuttanu niin pirusti.

No, on meilä senthään yks reissu ollu. Käythiin Heepo-settää kattomassa Rödupissa. Mamma ja pappa keräsit sielä viinimarjoja. 

Mettälenkilä mie pyyristelin lintuja ja jokea. Aurinko paisto, linnut lenteli, koski kohisi, ja 

mulle tuli jotenki haikea olo ja mettän  ikävä. No runohan se sieltä pulpahti (vaikkaki yhtä Aleksista matkimalla):

Mettänpoika tahon olla,

haukkuja jylhän kuusiston!

Viisavaaran vainiolla

papan kanssa mettästän

ja  huolet unhohlaan jääkhööt!

                                               

Huomena on taas synttärit. Saakutarallaa, mihin tämä aika oikein mennee?